PMFBY Scheme: ರೈತರೇ ಈ ಕೆಲಸ ತಪ್ಪದೇ ಮಾಡಿ, ನಿಮ್ಮ ಖಾತೆಗೆ ಜಮಾ ಆಗಲಿದೆ 50 ಪಟ್ಟು ಹೆಚ್ಚು ಹಣ! ಇಲ್ಲಿದೆ ಸಂಪೂರ್ಣ ವರದಿ

ಕರ್ನಾಟಕ ರೈತ ಸುರಕ್ಷಾ ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ ಅಡಿಯಲ್ಲಿ 2026-27 ಖಾರಿಫ್‌ಗೆ ಕಾಡುಪ್ರಾಣಿ ದಾಳಿ, ಮಳೆ, ಬರ, ಮುಳುಗಡೆ ಬೆಳೆ ಹಾನಿಗೂ ವಿಮೆ ನೀಡಲು ಸರ್ಕಾರ ಮುಂದಾಗಿದೆ. ಜೂನ್ 30ರೊಳಗೆ samrakshane.karnataka.gov.in ನಲ್ಲಿ ನೋಂದಣಿ ಕಡ್ಡಾಯ ಎನ್ನುವುದನ್ನು ಗಮನಿಸಿ.

ಚಿಕ್ಕಮಗಳೂರು: ವರುಣನ ಮುನಿಸು ಹಾಗೂ ಕಾಡುಪ್ರಾಣಿಗಳ ಹಾವಳಿಯಿಂದ ಬೆಳೆ ಕಳೆದುಕೊಂಡು ಕಂಗಾಲಾಗಿರುವ ಅನ್ನದಾತರಿಗೆ ಸರ್ಕಾರ ಭರ್ಜರಿ ಸಿಹಿಸುದ್ದಿ (Good News) ನೀಡಿದೆ. 2026-27ನೇ ಸಾಲಿನ ಮುಂಗಾರು (ಖಾರಿಫ್) ಹಂಗಾಮಿನ 'ಕರ್ನಾಟಕ ರೈತ ಸುರಕ್ಷಾ ಪ್ರಧಾನ ಮಂತ್ರಿ ಫಸಲ್ ಬಿಮಾ ಯೋಜನೆ' (PMFBY) ನೋಂದಣಿ ಈಗಾಗಲೇ ಭರದಿಂದ ಸಾಗಿದ್ದು, ಗ್ರಾಮ ಪಂಚಾಯಿತಿ ಹಾಗೂ ಹೋಬಳಿ ಮಟ್ಟದಲ್ಲಿ ವಿಮೆ ಮಾಡಿಸಲು ಅವಕಾಶ ಕಲ್ಪಿಸಲಾಗಿದೆ. ಈ ಬಾರಿ ರಾಜ್ಯ ರೈತರ ಬಹುದಿನಗಳ ಬೇಡಿಕೆಯಾಗಿದ್ದ 'ಕಾಡು ಪ್ರಾಣಿಗಳ ದಾಳಿ'ಯಿಂದಾಗುವ ಬೆಳೆ ಹಾನಿ ಹಾಗೂ ಭತ್ತದ ಗದ್ದೆ ಮುಳುಗಡೆಯನ್ನೂ ವಿಮಾ ವ್ಯಾಪ್ತಿಗೆ ಸೇರಿಸಲಾಗಿದ್ದು, ಇದು ರೈತರಿಗೆ ಅಕ್ಷರಶಃ ಸಂಜೀವಿನಿಯಾಗಲಿದೆ!

ಯಾರಿಗೆಲ್ಲಾ ಸಿಗುತ್ತೆ ಈ ವಿಮಾ ಲಾಭ?

ಯಾರಿಗೆ ಸಿಗಲಿದೆ ಈ ವಿಮಾ ಲಾಭ ಎಂದು ನೋಡುವುದಾದರೆ, ಬೆಳೆ ಸಾಲ ಪಡೆದವರು ಹಾಗೂ ಸಾಲ ಪಡೆಯದ ರೈತರಿಬ್ಬರೂ ಈ ಯೋಜನೆಯ ಲಾಭ ಪಡೆಯಬಹುದು. ಇದು ಸಂಪೂರ್ಣ ಸ್ವಯಂಪ್ರೇರಿತ ಯೋಜನೆಯಾಗಿದ್ದು, ಒಂದು ವೇಳೆ ಬೆಳೆ ಸಾಲ ಪಡೆದ ರೈತರಿಗೆ ಈ ವಿಮೆ ಮಾಡಿಸಲು ಇಷ್ಟವಿಲ್ಲದಿದ್ದರೆ, ಬೆಳೆ ನೋಂದಣಿಯ ಅಂತಿಮ ದಿನಾಂಕಕ್ಕೂ 7 ದಿನಗಳ ಮುಂಚಿತವಾಗಿ ತಮ್ಮ ಬ್ಯಾಂಕ್ ವ್ಯವಸ್ಥಾಪಕರಿಗೆ ಲಿಖಿತವಾಗಿ ಮುಚ್ಚಳಿಕೆ ಪತ್ರ ನೀಡಬೇಕು. ಇಲ್ಲವಾದರೆ ನಿಮ್ಮ ಸಾಲದ ಮೊತ್ತದಿಂದಲೇ ಸ್ವಯಂಚಾಲಿತವಾಗಿ ವಿಮಾ ಕಂತನ್ನು ಕಡಿತಗೊಳಿಸಲಾಗುತ್ತದೆ. ರೈತರು ತಮ್ಮ ಜಮೀನಿನ ಪಹಣಿ (RTC), ಬ್ಯಾಂಕ್ ಪಾಸ್‌ಬುಕ್ ಮತ್ತು ಆಧಾರ್ ಕಾರ್ಡ್ ಪ್ರತಿಯೊಂದಿಗೆ ಸಮೀಪದ ಬ್ಯಾಂಕ್, ಸಾಮಾನ್ಯ ಸೇವಾ ಕೇಂದ್ರ (CSC) ಅಥವಾ ಗ್ರಾಮ ಒನ್ ಕೇಂದ್ರಗಳಲ್ಲಿ ನೋಂದಾಯಿಸಿಕೊಳ್ಳಬಹುದು. ಆದರೆ, ನಿಮ್ಮ ಜಮೀನಿನ ಸರ್ವೆ ನಂಬರ್‌ಗಳು ಕಡ್ಡಾಯವಾಗಿ ಫ್ರೂಟ್ಸ್ (FRUITS) ತಂತ್ರಾಂಶದಲ್ಲಿ ನೋಂದಣಿಯಾಗಿರಬೇಕು ಹಾಗೂ ಏನಾದರೂ ತಿದ್ದುಪಡಿಗಳಿದ್ದರೆ ತಕ್ಷಣವೇ ರೈತ ಸಂಪರ್ಕ ಕೇಂದ್ರಕ್ಕೆ ಭೇಟಿ ನೀಡಿ ಸರಿಪಡಿಸಿಕೊಳ್ಳುವುದು ಅತ್ಯಗತ್ಯ.

ಈ ಸಮಯದಲ್ಲಿ ಪರಿಹಾರ ಸಿಗೋದು ಪಕ್ಕಾ!

ಯಾವ್ಯಾವಾಗ ಪರಿಹಾರ ಗ್ಯಾರಂಟಿ ಎನ್ನುವ ಲೆಕ್ಕಾಚಾರ ನೋಡುವುದಾದರೆ, ಮಳೆಯ ಅಭಾವದಿಂದಾಗಿ ಶೇಕಡಾ 75 ಕ್ಕಿಂತ ಹೆಚ್ಚಿನ ಕ್ಷೇತ್ರದಲ್ಲಿ ಬಿತ್ತನೆ ವಿಫಲಗೊಂಡರೆ, ತೇವಾಂಶ ಕೊರತೆ, ತೀವ್ರ ಬರಗಾಲ ಅಥವಾ ಮುಳುಗಡೆಯಿಂದಾಗಿ ಬಿತ್ತನೆಯಾದ ನಂತರ ಕಟಾವಿಗೆ 15 ದಿನಗಳಿಗಿಂತ ಮೊದಲು ಬೆಳೆ ಹಾನಿಯಾದರೆ ಎಸ್‌ಬಿಐ ಜನರಲ್ ಇನ್ಸೂರೆನ್ಸ್ ಕಂಪನಿ ಪರಿಹಾರ ನೀಡಲಿದೆ. ಅಷ್ಟೇ ಅಲ್ಲ, ಕಟಾವು ಮಾಡಿದ ನಂತರ 2 ವಾರಗಳೊಳಗೆ ಜಮೀನಿನಲ್ಲಿ ಒಣಗಲು ಬಿಟ್ಟಂತಹ ಬೆಳೆಯು ಚಂಡಮಾರುತ ಅಥವಾ ಅಕಾಲಿಕ ಮಳೆಯಿಂದ ನಾಶವಾದರೂ ಪರಿಹಾರ ಗ್ಯಾರಂಟಿ. ಖಾರಿಫ್ ಆಹಾರ ಮತ್ತು ತೈಲಬೀಜ ಬೆಳೆಗಳಿಗೆ ವಿಮಾ ಮೊತ್ತದ ಕೇವಲ ಶೇ.2 ರಷ್ಟು ಹಾಗೂ ತೋಟಗಾರಿಕೆ/ವಾಣಿಜ್ಯ ಬೆಳೆಗಳಿಗೆ ಶೇ.5 ರಷ್ಟು ಕಂತು ಕಟ್ಟಿದರೆ ಸಾಕು, ಉಳಿದ ಮೊತ್ತವನ್ನು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು 50:50 ಅನುಪಾತದಲ್ಲಿ ಸಬ್ಸಿಡಿ ರೂಪದಲ್ಲಿ ಭರಿಸಲಿವೆ.

ಜೂನ್‌ 30ರೊಳಗೆ ನೋಂದಣಿ ಕಡ್ಡಾಯ

ಯಾವ ಬೆಳೆಗೆ ಎಷ್ಟು ಪರಿಹಾರ ಮತ್ತು ನೀವು ಕಟ್ಟಬೇಕಾದ ಕಂತು ಎಷ್ಟು ಎಂಬ ಸಂಪೂರ್ಣ ವಿವರ ಇಲ್ಲಿದೆ. ಜೂನ್ 30ರೊಳಗೆ ನೋಂದಾಯಿಸಿಕೊಳ್ಳಬೇಕಾದ ಮಳೆಯಾಶ್ರಿತ ಹೆಸರು ಬೆಳೆಗೆ ಕೇವಲ 794 ರೂ. ಕಂತು ಕಟ್ಟಿದರೆ, ಬರೋಬ್ಬರಿ 39,700 ರೂ.ಗಳ ವಿಮಾ ರಕ್ಷಣೆ ಸಿಗಲಿದೆ. ಅದೇ ರೀತಿ ಜುಲೈ 15ರೊಳಗೆ ನೋಂದಾಯಿಸಿಕೊಳ್ಳಬೇಕಾದ ನೀರಾವರಿ ಆಲೂಗಡ್ಡೆ ಬೆಳೆಗೆ 8,565 ರೂ. ಕಂತು ಪಾವತಿಸಿದರೆ ಗರಿಷ್ಠ 1,71,300 ರೂ. ವಿಮಾ ಮೊತ್ತ ಲಭ್ಯವಾಗಲಿದೆ. ಮಳೆಯಾಶ್ರಿತ ಆಲೂಗಡ್ಡೆಗೆ 4,120 ರೂ. ಕಂತಿಗೆ 82,400 ರೂ. ವಿಮಾ ಮೊತ್ತ, ಮಳೆಯಾಶ್ರಿತ ಈರುಳ್ಳಿಗೆ 4,280 ರೂ. ವಿಮಾ ಕಂತು ಪಾವತಿಸಿದರೆ 85,600 ರೂ. ಕವರೇಜ್ ಹಾಗೂ ಟೊಮೆಟೊ ಬೆಳೆಗೆ 8,490 ರೂ. ಪ್ರೀಮಿಯಂಗೆ ಬರೋಬ್ಬರಿ 1,69,800 ರೂ. ವಿಮಾ ಮೊತ್ತ ಸಿಗಲಿದೆ.

ಇವುಗಳಿಗೆ ಜುಲೈ ಒಳಗೆ ವಿಮೆ ಕಡ್ಡಾಯ

ಜುಲೈ 31ರೊಳಗೆ ವಿಮೆ ಮಾಡಿಸಬೇಕಾದ ಬೆಳೆಗಳ ಪೈಕಿ, ಮಳೆಯಾಶ್ರಿತ ಕೆಂಪು ಮೆಣಸಿನಕಾಯಿಗೆ 4,540 ರೂ. (ಶೇ. 5) ಕಂತು ಕಟ್ಟಿದರೆ 90,800 ರೂ. ಭರ್ಜರಿ ಪರಿಹಾರ ಸಿಗಲಿದೆ. ಮಳೆಯಾಶ್ರಿತ ಹತ್ತಿ ಬೆಳೆಗೆ ಕೇವಲ 2,985 ರೂ. (ಶೇ. 5) ಪ್ರೀಮಿಯಂಗೆ 59,700 ರೂ. ರಕ್ಷಣೆ, ಮಳೆಯಾಶ್ರಿತ ನೆಲಗಡಲೆಗೆ 1,308 ರೂ. ಕಂತಿಗೆ 65,400 ರೂ. ವಿಮಾ ಮೊತ್ತ ನಿಗದಿಪಡಿಸಲಾಗಿದೆ. ಇದರೊಂದಿಗೆ ಮಳೆಯಾಶ್ರಿತ ಸೂರ್ಯಕಾಂತಿಗೆ 964 ರೂ. ಕಟ್ಟಿದರೆ 48,200 ರೂ. ಪರಿಹಾರ ಹಾಗೂ ಮಳೆಯಾಶ್ರಿತ ಜೋಳಕ್ಕೆ ಕೇವಲ 888 ರೂ. ಕಂತಿಗೆ 44,400 ರೂ.ಗಳ ರಕ್ಷಣೆಯನ್ನು ಒದಗಿಸಲಾಗಿದೆ.