change your vehicle number plate by november 1 otherwise 500 rupees fine fix
ಇದೇ ನವೆಂಬರ್‌ 1 ರಿಂದ ರಾಜ್ಯಾದ್ಯಂತ ಹೈ ಸೆಕ್ಯೂರಿಟಿ ರಿಜಿಸ್ಪ್ರೇಷನ್‌ ಪ್ಲೇಟ್‌ (ಎಚ್‌ಎಸ್‌ಆರ್‌ಪಿ) ಕಡ್ಡಾಯವಾಗಲಿದೆ. ಅದರಂತೆ 2019ಕ್ಕೂ ಮೊದಲು ನೋಂದಣಿಯಾಗಿರುವ ಎಲ್ಲಾ ವಾಹನಗಳ ಮಾಲೀಕರು ತಮ್ಮ ವಾಹನಗಳಿಗೆ ಅತ್ಯಾಧುನಿಕ ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್‌ ಅಳವಡಿಸುವುದು ಕಡ್ಡಾಯವಾಗಿದೆ.
ನವೆಂಬರ್‌ 1ಕ್ಕೂ ಮುನ್ನ ಎಲ್ಲ ವಾಹನಗಳಲ್ಲೂ ಈ ಪ್ಲೇಟ್‌ ಇರಬೇಕು. ಇಲ್ಲದಿದ್ದರೆ 500 ರೂ. ದಂಡ ವಿಧಿಸಲಾಗುತ್ತದೆ. ಹೊಸ ನಂಬರ್‌ ಪ್ಲೇಟ್‌ ಹಾಕಿಸುವ ಅಂತಿಮ ದಿನಾಂಕವನ್ನು ಸರ್ಕಾರ ವಿಸ್ತರಿಸುವ ಸಾಧ್ಯತೆ ಹೆಚ್ಚಾಗಿದೆ.
ರಾಜ್ಯದ 2 ಕೋಟಿ ವಾಹನಗಳಿಗೆ ಹೊಸ ನಂಬರ್‌ ಪ್ಲೇಟ್‌
ಪ್ರಸ್ತುತ ಆನ್‌ಲೈನ್‌ನಲ್ಲಿ ನಂಬರ್‌ ಪ್ಲೇಟ್‌ಗಳ ಬುಕಿಂಗ್‌ ಪ್ರಕ್ರಿಯೆ ನಡೆಯುತ್ತಿದ್ದು, ರಾಜ್ಯಾದ್ಯಂತ ಲಕ್ಷಾಂತರ ವಾಹನ ಮಾಲೀಕರು ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್‌ಗಳನ್ನು ಬುಕ್‌ ಮಾಡಿದ್ದಾರೆ. ಅಷ್ಟೇ ಮಂದಿ ಈಗಾಗಲೆ ತಮ್ಮ ವಾಹನಗಳಿಗೆ ಹೊಸ ಪ್ಲೇಟ್‌ ಅಳವಡಿಸಿಕೊಂಡಿದ್ದಾರೆ. ಪ್ರಸ್ತುತ ದೇಶದ 12 ರಾಜ್ಯಗಳಲ್ಲಿಈ ವ್ಯವಸ್ಥೆ ಜಾರಿಯಲ್ಲಿದ್ದು, ರಾಜ್ಯದಲ್ಲಿ2019ಕ್ಕೂ ಮೊದಲು ನೋಂದಣಿಯಾಗಿರುವ ಸುಮಾರು 1.75ರಿಂದ 2 ಕೋಟಿ ವಾಹನಗಳಿಗೆ ಎಚ್‌ಎಸ್‌ಆರ್‌ಪಿ ಪ್ಲೇಟ್‌ ಅಳವಡಿಸಬೇಕಿದೆ.
ವಾಹನ ಸಂಬಂಧಿ ಅಪರಾಧ ತಡೆಯುವುದು ಎಚ್‌ಎಸ್‌ಆರ್‌ಪಿ ಕಡ್ಡಾಯದ ಹಿಂದಿನ ಉದ್ದೇಶ. ಈ ನಂಬರ್‌ ಪ್ಲೇಟನ್ನು ವಾಹನದಿಂದ ಬೇರ್ಪಡಿಸುವುದು, ನಕಲು ಮಾಡುವುದು ಅಸಾಧ್ಯ. ಇದು ಹೊರಗೆ ಎಲ್ಲೂಸಿಗುವುದಿಲ್ಲ. ಕಾರಣ ಸಾರ್ವಜನಿಕರು ಮೋಸದ ಜಾಲಗಳಿಗೆ ಬಲಿಯಾಗದೆ, ನಿಗದಿತ ವೆಬ್‌ಸೈಟ್‌ಗಳ ಮೂಲಕವಷ್ಟೇ ಬುಕ್‌ ಮಾಡಬೇಕು. ಪ್ಲೇಟ್‌ ಫಿಟ್‌ ಮಾಡಲು ಶೋರೂಮಿನವರಿಗೆ ಹೆಚ್ಚುವರಿ ಶುಲ್ಕ ಕೊಡುವ ಅಗತ್ಯವಿಲ್ಲ ಎಂದು ಪ್ರಾದೇಶಿಕ ಸಾರಿಗೆ ಅಧಿಕಾರಿ ಶ್ರೀಧರ್‌ ಕೆ. ಮಲ್ಲಾಡ್‌ ಹೇಳುತ್ತಾರೆ.
ಏನಿದು ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್‌? ಏಕೆ ಕಡ್ಡಾಯ?
ಹೈ ಸೆಕ್ಯೂರಿಟಿ ರಿಜಿಸ್ಪ್ರೇಷನ್‌ ಪ್ಲೇಟ್‌ (ಎಚ್‌ಎಸ್‌ಆರ್‌ಪಿ), ಇದು ವಾಹನ ನೋಂದಣಿ ಸಂಖ್ಯೆ ಬಿತ್ತರಿಸುವ ನಂಬರ್‌ ಪ್ಲೇಟ್‌ನ ಅತ್ಯಾಧುನಿಕ ಅವತಾರ. ಇಲ್ಲಿಅಲ್ಯುಮೀನಿಯಂ ಪ್ಲೇಟ್‌ ಮೇಲೆ ವಾಹನದ ಸಂಖ್ಯೆಯನ್ನು ಎಂಬೋಸ್‌ ಮಾಡಲಾಗಿರುತ್ತದೆ. ಪ್ಲೇಟ್‌ನ ಎಡ ಮೇಲ್ಭಾಗದಲ್ಲಿ20*20 ಎಂಎಂ ಅಳತೆಯ, ನೀಲಿ ಬಣ್ಣದ ಅಶೋಕ ಚಕ್ರದ ಕ್ರೋಮಿಯಂ ಬೇಸ್ಡ್‌ ಹಾಲೋಗ್ರಾಮ್‌, ಅದರ ಕೆಳಗೆ 10 ಅಂಕಿಗಳ ಪರ್ಮನೆಂಟ್‌ ಐಡೆಂಟಿಫಿಕೇಷನ್‌ ಲೇಸರ್‌ ನಂಬರ್‌ (ಪಿಐಎನ್‌) ಇರುತ್ತದೆ.
ಪ್ರಸ್ತುತ ಬೆಂಗಳೂರು, ದಾವಣಗೆರೆ, ಮೈಸೂರು, ಮಂಗಳೂರು, ಹುಬ್ಬಳ್ಳಿ ಸೇರಿ ರಾಜ್ಯದ ಬಹುತೇಕ ಮಹಾನಗರಗಳಲ್ಲಿಆಟೋಮ್ಯಾಟಿಕ್‌ ನಂಬರ್‌ ಪ್ಲೇಟ್‌ ರೆಕಗ್ನಿಷನ್‌ (ಎಎನ್‌ಪಿಆರ್‌) ಕ್ಯಾಮೆರಾಗಳನ್ನು ಅಳವಡಿಸಲಾಗಿದೆ. ವಾಹನದ ನಂಬರ್‌ ನೋಡಿದ ಕೂಡಲೆ ಅದರ ಇತಿಹಾಸ ತಿಳಿಸುವುದು ಈ ಕ್ಯಾಮೆರಾಗಳ ವಿಶೇಷತೆ. ಎಚ್‌ಎಸ್‌ಆರ್‌ಪಿಗಳು ಈ ಕ್ಯಾಮೆರಾಗಳ ಕೆಲಸವನ್ನು ಸುಲಭವಾಗಿಸುತ್ತವೆ. ಜತೆಗೆ ವಾಹನ ಸಂಬಂಧಿತ ಅಪರಾಧಗಳನ್ನು ತಡೆಗಟ್ಟುವುದು ಹಾಗೂ ಒಟ್ಟಾರೆ ರಸ್ತೆ ಸುರಕ್ಷತೆ ಖಚಿತಪಡಿಸುತ್ತವೆ.
ಎಚ್‌ಎಸ್‌ಆರ್‌ಪಿ ವಿಶೇಷತೆ ಏನು?
ಈ ಅತ್ಯಾಧುನಿಕ ನಂಬರ್‌ ಪ್ಲೇಟ್‌ಗಳನ್ನು ನಕಲು ಮಾಡುವುದು ಅಸಾಧ್ಯ
ವಿಶೇಷ ತಂತ್ರಜ್ಞಾನ ಒಳಗೊಂಡ ವಿರೂಪಗೊಳಿಸಲು ಸಾಧ್ಯವಿಲ್ಲದ ಅಶೋಕ ಚಕ್ರದ ಹಾಲೋಗ್ರಾಮ್‌
ಲೇಸರ್‌ನಿಂದ ಬರೆಯಲಾಗಿರುವ 10 ಅಂಕಿಗಳ (ಆಲ್ಫಾ ನ್ಯೂಮೆರಿಕ್‌) ವಿಶಿಷ್ಟ ಲೇಸರ್‌ ಪಿನ್‌
ನಂಬರ್‌ ಪ್ಲೇಟ್‌ಗಳನ್ನು ವಾಹನದಿಂದ ಬೇರ್ಪಡಿಸುವುದು, ಮರುಬಳಕೆ ಮಾಡಲು ಆಗುವುದಿಲ್ಲ
ರಾತ್ರಿ ವೇಳೆ ಗೋಚರಿಸುವಿಕೆ, ಸುಮಾರು 200 ಮೀ. ದೂರದಿಂದಲೂ ಗೋಚರಿಸುವ ತಂತ್ರಜ್ಞಾನ
2019ಕ್ಕೂ ಮೊದಲು ರಾಜ್ಯದಲ್ಲಿಏಕರೂಪ ನಂಬರ್‌ ಪ್ಲೇಟ್‌ ನಿರ್ದಿಷ್ಟ ಕಾನೂನು ಇರಲಿಲ್ಲ.
2019ರ ಬಳಿಕ ಎಚ್‌ಎಸ್‌ಆರ್‌ಪಿ ಅಳವಡಿಸಲಾಗುತ್ತಿದ್ದು, ನಂಬರ್‌ ಪ್ಲೇಟ್‌ ದಂಧೆಗೆ ಬ್ರೇಕ್‌ ಬಿದ್ದಿದೆ.
ಎಚ್‌ಎಸ್‌ಆರ್‌ಪಿ ಪ್ಲೇಟ್‌ ಪಡೆಯುವುದು ಹೇಗೆ?
ವಾಹನ ಮಾಲೀಕರು ಸಾರಿಗೆ ಇಲಾಖೆ ಅಧಿಕೃತ ಜಾಲತಾಣಗಳಿಗೆ ಭೇಟಿ ನೀಡಿ ಎಚ್‌ಎಸ್‌ಆರ್‌ಪಿ ನಂಬರ್‌ ಪ್ಲೇಟ್‌ಗಳನ್ನು ಬುಕ್‌ ಮಾಡಬೇಕು. https://bookmyhsrp.com/
ಈ ವೇಳೆ ವಾಹನದ ನೋಂದಣಿ ಸಂಖ್ಯೆ, ಎಂಜಿನ್‌ ಮತ್ತು ಚಾಸ್ಸಿ ಸಂಖ್ಯೆ, ತಮ್ಮ ಮೊಬೈಲ್‌ ಸಂಖ್ಯೆ, ಇಮೇಲ್‌ ವಿಳಾಸ ನೀಡಬೇಕು. ಹೆಚ್ಚೆಂದರೆ 10 ನಿಮಿಷದಲ್ಲಿ ಬುಕಿಂಗ್‌ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ.
ಮಳಿಗೆಗೆ ಬರುತ್ತದೆ ನಂಬರ್‌ ಪ್ಲೇಟ್‌
ಆನ್‌ಲೈನ್‌ನಲ್ಲಿಎಚ್‌ಎಸ್‌ಆರ್‌ಪಿ ಬುಕ್‌ ಮಾಡುವಾಗ ನೀವು ಪ್ಲೇಟ್‌ ಪಡೆಯಲು ಇಚ್ಛಿಸುವ ನಗರ, ದಿನಾಂಕ ಆಯ್ಕೆ ಮಾಡಿಕೊಳ್ಳಬೇಕು. ನಿಮ್ಮ ಆಯ್ಕೆಯ ನಗರದಲ್ಲಿರುವ, ನಿಮ್ಮ ವಾಹನದ ಕಂಪನಿಯ (ಬ್ರಾಂಡ್‌) ಡೀಲರ್‌ ಮಳಿಗೆಗೆ ನಂಬರ್‌ ಪ್ಲೇಟ್‌ ಕಳಿಸಲಾಗುತ್ತದೆ. ವಾಹನ ಮಾಲೀಕರು ನಿಗದಿತ ದಿನಾಂಕದಂದು ಶೋರೂಮ್‌ಗೆ ಹೋಗಿ, ಬುಕಿಂಗ್‌ ವೇಳೆ ಪಡೆದ ರೆಸಿಪ್ಟ್‌ ತೋರಿಸಿ ನಂಬರ್‌ ಪ್ಲೇಟ್‌ ಫಿಟ್‌ ಮಾಡಿಸಿಕೊಳ್ಳಬೇಕು.