E Property Getting Easy :
ಸದ್ಯ ಇ - ಸ್ವತ್ತು ಪಡೆಯಬೇಕು ಎಂದರೆ ಅರ್ಜಿ ಸಲ್ಲಿಸಿ ತಿಂಗಳುಗಟ್ಟಲೆ ಕಾಯಬೇಕಾದ ಸ್ಥಿತಿ ಇದೆ. ಈ ಸಮಸ್ಯೆಗೆ ಪರಿಹಾರ ಕಲ್ಪಿಸುವ ನಿಟ್ಟಿನಲ್ಲಿ ಗ್ರಾಮ ಪಂಚಾಯ್ತಿಗಳಲ್ಲಿಯೇ ದಿಶಾಂಕ್‌ ಆ್ಯಪ್‌ ಬಳಸಲು ಸರ್ಕಾರ ಮುಂದಾಗಿದೆ. ಈ ಮೂಲಕ ಕಡಿಮೆ ಸಮಯ ಹಾಗೂ ಖರ್ಚಿನಲ್ಲಿ ಇ - ಸ್ವತ್ತು ಕೈಸೇರಲಿದೆ
ಗ್ರಾಮ ಠಾಣೆ ವ್ಯಾಪ್ತಿಯಲ್ಲಿ ಆಸ್ತಿಯ ಇ-ಖಾತೆ ಪಡೆಯಲು ಇನ್ನು ಮುಂದೆ ಗ್ರಾಹಕರು ತಿಂಗಳುಗಟ್ಟಲೇ ಕಾಯಬೇಕಿಲ್ಲ. ಹೆಚ್ಚಿನ ಹಣವನ್ನೂ ಕಟ್ಟಬೇಕಿಲ್ಲ. ಏಕೆಂದರೆ ಇದಕ್ಕಾಗಿ ಇನ್ನು ಗ್ರಾ.ಪಂನಲ್ಲೇ 'ದಿಶಾಂಕ್‌ ಆ್ಯಪ್‌' ಬಳಸಲಾಗುತ್ತದೆ
ಈವರೆಗೆ ನಾಡಕಚೇರಿ, ತಾಲೂಕು ಕಚೇರಿಗಳಲ್ಲಿ ಮಾತ್ರ ಚಾಲ್ತಿಯಲ್ಲಿದ್ದ ಹಾಗೂ ಕೃಷಿ ಜಮೀನುಗಳ ಅಳತೆ, ಇ-ಸ್ವತ್ತು ನೀಡುವಲ್ಲಿ ಪರಿಣಾಮಕಾರಿಯಾಗಿ ಕೆಲಸ ಮಾಡುತ್ತಿದ್ದ ದಿಶಾಂಕ್‌ ಆ್ಯಪ್‌ ಅನ್ನು ಗ್ರಾಮ ಮಟ್ಟದಲ್ಲಿ ಪರಿಚಯಿಸಲು ಸರಕಾರ ನಿರ್ಧರಿಸಿದೆ. ಅದರಂತೆ ಗ್ರಾಮ ಠಾಣಾ ವ್ಯಾಪ್ತಿಯ (ಗೋಮಾಳವಲ್ಲದ) ನಿವೇಶನ, ಭೂಮಿಯಲ್ಲಿ ಮನೆ ಕಟ್ಟಬೇಕೆಂದರೆ ಇ-ಖಾತೆಯನ್ನು ಶೀಘ್ರವಾಗಿ ಪಡೆಯಲು ಇದು ನೆರವಾಗಲಿದೆ. ಈವರೆಗೆ ಗ್ರಾಹಕರು ಅರ್ಜಿಯೊಂದಿಗೆ 800 ರೂ. ಶುಲ್ಕ ಪಾವತಿಸಬೇಕಿತ್ತು. ಇದೀಗ ದಿಶಾಂಕ್‌ನಿಂದಾಗಿ 200 ರೂ. ಪಾವತಿಸಿದರೆ ಸಾಕು.
ಪ್ರಸ್ತುತ ವಿಧಾನ ಹೆಚ್ಚು ಶುಲ್ಕ, ಸಾಕಷ್ಟು ತಡ
ಪ್ರಸ್ತುತ ಇ-ಸ್ವತ್ತು ತಂತ್ರಾಂಶದ ಮೂಲಕ ನಮೂನೆ-9 ಮತ್ತು 2ಎ, ನಮೂನೆ 2ಬಿ ಪಡೆಯಲು ಗ್ರಾಮ ಪಂಚಾಯಿತಿಗಳಿಗೆ ಭೇಟಿ ನೀಡಿ ಅರ್ಜಿ ಸಲ್ಲಿಸುತ್ತಿದ್ದರು. ಗ್ರಾ.ಪಂ ಅಧಿಕಾರಿಗಳು ಸದರಿ ಆಸ್ತಿಯು ಗ್ರಾಮ ಠಾಣಾದ ಒಳಗೆ ಬರುತ್ತದೆಯೋ ಅಥವಾ ಇಲ್ಲವೋ ಎಂಬುದನ್ನು ಖಾತರಿಪಡಿಸಿಕೊಳ್ಳಲು ಮೋಜಣಿ ತಂತ್ರಾಂಶದ ಮೂಲಕ ಆನ್‌ಲೈನ್‌ ಅರ್ಜಿಯನ್ನು ಸಲ್ಲಿಸುತ್ತಾರೆ. ತದನಂತರ ಅರ್ಜಿದಾರರು ನಾಡಕಚೇರಿ ಕೇಂದ್ರಗಳಿಗೆ ಭೇಟಿ ನೀಡಿ 800 ರೂ. ಅರ್ಜಿ ಶುಲ್ಕ ಪಾವತಿಸಬೇಕಾಗುತ್ತದೆ. ಅದಾದ ಬಳಿಕ ಭೂಮಾಪಕರು ಅಳತೆ ಮಾಡಿ ಸದರಿ ಆಸ್ತಿಯು ಗ್ರಾಮಠಾಣಾ ಒಳಗೆ ಅಥವಾ ಹೊರಗೆ ಬರುವ ಬಗ್ಗೆ ದಾಖಲೆಗಳೊಂದಿಗೆ ಮಾಹಿತಿಯನ್ನು ಮೋಜಣಿ ತಂತ್ರಾಂಶದ ಮೂಲಕ ಗ್ರಾ.ಪಂ ಗೆ ಸಲ್ಲಿಸುತ್ತಾರೆ
25 ಸಾವಿರ ಅರ್ಜಿ ಬಾಕಿ
ಸದ್ಯದ ಪ್ರಕ್ರಿಯೆ ಸಾಕಷ್ಟು ವಿಳಂಬವಾಗುತ್ತದೆ. ಇದರಿಂದ ಇ-ಖಾತೆ ಸಿಗುವುದು ತುಂಬಾ ವಿಳಂಬವಾಗುತ್ತಿತ್ತು. ಹೀಗಾಗಿ ರಾಜ್ಯದಲ್ಲಿಮೋಜಣಿ ಲಾಗಿನ್‌ನಲ್ಲಿಯೇ ಸುಮಾರು 25 ಸಾವಿರಕ್ಕೂ ಹೆಚ್ಚು ಅರ್ಜಿಗಳು ಬಾಕಿ ಉಳಿದಿವೆ. ದಿಶಾಂಕ್‌ ಆ್ಯಪ್‌ನಿಂದ ಬಾಕಿ ಅರ್ಜಿಗಳು ಜರೂರಾಗಿ ವಿಲೇವಾರಿಯಾಗಲಿವೆ. ಮುಂದಿನ ದಿನಗಳಲ್ಲಿಇ-ಖಾತೆಗೆ ಅರ್ಜಿ ಸಲ್ಲಿಸಿದ ಗ್ರಾಹಕರಿಗೆ ಒಂದೆರಡು ದಿನದಲ್ಲಿಖಾತೆ ಸಿಗಲಿದೆ.
ಏನಿದು ದಿಶಾಂಕ್‌ ಆ್ಯಪ್‌?
ದಿಶಾಂಕ್‌ ಅಪ್ಲಿಕೇಶನ್‌ ಒಂದು ಮೊಬೈಲ್‌ ಅಪ್ಲಿಕೇಶನ್‌ ಆಗಿದ್ದು ಅದು ಕರ್ನಾಟಕದೊಳಗೆ ಎಲ್ಲಿಯಾದರೂ ಇರುವ ಆಸ್ತಿ, ಪ್ಲಾಟ್‌ಗಳ ವಿವರಗಳನ್ನು ಕಂಡುಹಿಡಿಯಲು ನೆರವಾಗುತ್ತದೆ. ಮಾಹಿತಿಯು ಭೂಮಿಯ ಮಾಲೀಕತ್ವ, ವಿಸ್ತೀರ್ಣ, ನಕ್ಷೆ ಇತ್ಯಾದಿಗಳನ್ನು ಒಳಗೊಂಡಿದೆ. ಆ್ಯಪ್‌ ಕರ್ನಾಟಕದ ಗ್ರಾಮಗಳ ಭೂ-ಉಲ್ಲೇಖಿತ ನಕ್ಷೆಗಳನ್ನು ಒಳಗೊಂಡಿದ್ದು, ಭೂಮಿ ಡೇಟಾಬೇಸ್‌ನಲ್ಲಿ ದಾಖಲಾದ ಭೂ ದಾಖಲೆಗಳಿಗೆ ಲಿಂಕ್‌ ಮಾಡಲಾಗಿದೆ. ಕರ್ನಾಟಕದಲ್ಲಿಆಸ್ತಿ-ಸಂಬಂಧಿತ ವಂಚನೆಗಳನ್ನು ಕಡಿಮೆ ಮಾಡಲು ಹಾಗೂ ಆಸ್ತಿ ಖರೀದಿದಾರರು ಮತ್ತು ಹೂಡಿಕೆದಾರರಿಗೆ ಭೂ ದಾಖಲೆಗಳ ಮಾಹಿತಿ ಒದಗಿಸುವುದು ಇದರ ಉದ್ದೇಶವಾಗಿದೆ.
ಅನುಷ್ಠಾನ ಹೇಗೆ?
ಆಸ್ತಿ ವಿವರಗಳನ್ನು ಪರಿಶೀಲಿಸಿ, ಇ-ಖಾತೆ ನೀಡಲು ನೆರವಾಗುವಂತೆ ಅನುಷ್ಠಾನಕ್ಕಾಗಿ ಗ್ರಾ.ಪಂ.ನಲ್ಲಿಅಲ್ಲಿನ ದ್ವಿತೀಯ ದರ್ಜೆ ಲೆಕ್ಕ ಸಹಾಯಕರು ಅಥವಾ ಗ್ರಾ.ಪಂ. ಕಾರ್ಯದರ್ಶಿಗಳನ್ನು ಮೇಕರ್‌ಗಳನ್ನಾಗಿ ಹಾಗೂ ಪಿಡಿಒಗಳನ್ನು ಚೆಕರ್‌ಗಳಾಗಿ ನಿಯೋಜಿಸಲಾಗುವುದು. ಅರ್ಜಿದಾರರು ನಿಗದಿತ ಶುಲ್ಕದೊಂದಿಗೆ ಗ್ರಾಮ ಪಂಚಾಯಿತಿಗಳಲ್ಲೇ ಅರ್ಜಿ ಸಲ್ಲಿಸಬೇಕು. ಗ್ರಾ.ಪಂ. ಅಧಿಕಾರಿಗಳು ಇ- ತಂತ್ರಾಂಶದ ಮೂಲಕ ಅರ್ಜಿದಾರರ ಪೂರ್ಣ ವಿವರಗಳನ್ನು ದಾಖಲಿಸಿಕೊಳ್ಳಬೇಕು. ಅರ್ಜಿದಾರರಿಂದ ಪಡೆದ ಆಸ್ತಿಯ ವಿಸ್ತೀರ್ಣ ಮತ್ತು ಚಕ್ಕುಬಂದಿಯ ಆಧಾರದ ಮೇಲೆ ಗ್ರಾ.ಪಂ. ಕಾರ್ಯದರ್ಶಿ/ದ್ವಿತೀಯ ದರ್ಜೆ ಲೆಕ್ಕ ಸಹಾಯಕರು ಭೌತಿಕವಾಗಿ ಸ್ಥಳಕ್ಕೆ ಭೇಟಿ ನೀಡಿ ದಿಶಾಂಕ್‌ ಆ್ಯಪ್‌ ಮೂಲಕ ಆಸ್ತಿ/ಸ್ವತ್ತಿನ ಪ್ರತಿಯೊಂದು ಮೂಲೆಯ ಜಿಪಿಎಸ್‌ ಮತ್ತು ಸದರಿ ಆಸ್ತಿ/ಸ್ವತ್ತಿನ ಛಾಯಾಚಿತ್ರ ಸೆರೆಹಿಡಿಯುವುದು, ನಂತರ ಜಿಪಿಎಸ್‌ ಮತ್ತು ಛಾಯಾಚಿತ್ರವನ್ನು ಪಿಡಿಒಗಳು ಸ್ಥಳಕ್ಕೆ ಭೇಟಿ ನೀಡದೆ ದಿಶಾಂಕ್‌ ಆ್ಯಪ್‌ ಲಾಗಿನ್‌ ಮೂಲಕ ಪರಿಶೀಲಿಸಿ ದೃಢೀಕರಿಸುವರು.
ಶೇ.90 ರಷ್ಟು ಅರ್ಜಿಗಳು ಗ್ರಾಮಠಾಣಾ ವ್ಯಾಪ್ತಿಯಲ್ಲೇ ವಿಲೇವಾರಿ
ದಿಶಾಂಕ್‌ ಆ್ಯಪ್‌ ಮೂಲಕ ಗ್ರಾಮಠಾಣಾ ಆಸ್ತಿಗಳ ವಿವರ ದಾಖಲೆಯಲ್ಲಿ ಕ್ರಾಂತಿಕಾರಿಕ ಬದಲಾವಣೆ ತರಲು ನೆರವಾಗಲಿದೆ. ಇದರಿಂದ ಶೇ.80-90ರಷ್ಟು ಅರ್ಜಿಗಳು ಗ್ರಾಮಠಾಣಾ ಮಟ್ಟದಲ್ಲೇ ನಿಗದಿತ ಸಮಯದಲ್ಲಿ ವಿಲೇವಾರಿಯಾಗಲಿವೆ. ಉಳಿದ ಶೇ.10ರಷ್ಟು ಅರ್ಜಿಗಳು ಮಾತ್ರ ಸರ್ವೆ ಇಲಾಖೆಗೆ ರವಾನೆಯಾಗಲಿವೆ. ಇದರಿಂದ ಅರ್ಜಿದಾರರಿಗೂ ಅನುಕೂಲ, ಸರಕಾರಕ್ಕೂ ಅನುಕೂಲವಾಗಲಿದೆ ಎಂದು ಗ್ರಾಮೀಣಾಭಿವೃದ್ಧಿ ಪಂಚಾಯತ್‌ ರಾಜ್‌ ಇಲಾಖೆ ರಾಜ್ಯ ಪರಿಷತ್‌ ಸದಸ್ಯರು ಎಚ್‌.ಆರ್‌.ರಾಜೇಶ್‌ ತಿಳಿಸಿದ್ದಾರೆ.